Sigun sa grupo nga ang pagpangandam sa gobyerno kinahanglan molapas sa mga pahimangno ug maglakip sa kasaligan nga suplay sa tubig, lig-on nga sistema sa enerhiya, ug igo nga reserba sa pagkaon aron mamenosan ang epekto sa grabeng hulaw sa mga panimalay.
Base sa datos sa National Disaster Risk Reduction and Management Council (NDRRMC) niadtong Oktubre 5, 2026, mikabat na sa 106 ka siyudad ug lungsod ang nagdeklarar og state of calamity tungod sa El Niño, nga nakaapekto sa 388,375 ka tawo o 104,149 ka pamilya sa tibuok nasud.
Gilauman nga magpadayon ang kusog hangtod sa hilabihan kakusog nga El Niño sa unang tunga sa 2027, hinungdan nga nanawagan ang DCM nga sayo nang ipatuman ang mga lakang aron malikayan ang mas dakong krisis.
Matod sa grupo, dili igo ang pag-awhag sa katawhan nga magtipig og tubig-ulan gamit ang mga balde. Bisan importante ang pagdaginot sa tubig, kinahanglan usab ang lig-on nga imprastraktura, emergency water supply, ug klarong mga plano aron masiguro ang igo ug kasaligan nga suplay sa tubig.
Gipasidan-an usab sa DCM nga posibleng maapektuhan ang produksiyon sa kuryente tungod sa pagkunhod sa tubig sa mga hydroelectric plant, samtang ang grabeng kainit mahimong mopataas sa konsumo sa elektrisidad.
Dugang pa niini, ang posibleng pagkunhod sa ani sa humay, utanon, ug uban pang produkto sa agrikultura mahimong mosangpot sa pagsaka sa presyo sa pagkaon ug dugang palas-anon sa mga konsyumer.
Busa, giawhag sa grupo ang national government nga magpatuman og komprehensibong plano nga naglangkob sa pagpangandam, pagpamenos sa epekto sa hulaw, dali nga pagtubag sa krisis, ug pagtabang sa mga komunidad nga maapektuhan.
Lakip sa mga prayoridad ang pagpalambo sa pasilidad sa pagtipig sa tubig, pag-andam og buffer stocks sa pagkaon, pagsiguro sa lig-on nga suplay sa kuryente, ug paghatag og tabang sa mga panimalay ug panginabuhian nga maigo sa krisis.
Giawhag usab ang mga lokal nga pangagamhanan nga dili maghulat sa direktiba sa national government, kondili makigtambayayong dayon sa mga water provider, mag-uuma, electric cooperative, health officials, sektor sa negosyo, ug uban pang hingtungdang grupo aron makahimo og mga solusyon nga angay sa panginahanglan sa ilang mga komunidad.
Suma sa DCM nga ang mga lokalidad nga grabeng maapektuhan kinahanglan makadawat dayon og suporta, lakip ang paggamit sa calamity funds kon gikinahanglan ug subay sa balaod ug hustong proseso.
Gipangayo usab sa grupo ang transparency ug accountability sa paggamit sa pondo sa pagpangandam sa El Niño. Matod niini, kinahanglan ipahibalo sa publiko ang kantidad sa pondo nga gigahin ug gipagawas, ang paggamit niini, ug ang mga komunidad nga nakadawat na og tabang.
Alang sa DCM, dili angay ipasa sa mga konsyumer ang kabug-at sa krisis nga mahimong mapagaan pinaagi sa sayong pagpangandam ug epektibong pagdumala.
Matod sa grupo nga ang tinuod nga pagpangandam sa Super El Niño kinahanglan makita sa konkretong resulta—igo nga tubig, kasaligan nga suplay sa kuryente, barato nga pagkaon, ug tukmang tabang sa mga pamilyang nanginahanglan.